Matoshree Drone: वांद्रे येथील ठाकरे घराण्याचे निवासस्थान ‘मातोश्री’ परिसरात अचानक ड्रोन उडताना दिसल्याने एकच खळबळ उडाली आहे. मातोश्री आणि एमएमआरडीए कार्यालयाच्या मधल्या रस्त्यावर हे ड्रोन घिरट्या घालत असल्याचे दिसून आले. सुरक्षारक्षकांच्या नजरेस हे ड्रोन आल्यावर त्यांनी तत्काळ त्याचा व्हिडीओ शूट केला. हा व्हिडीओ काही क्षणांतच सोशल मीडियावर व्हायरल झाला असून, नागरिकांमध्ये आणि राजकीय वर्तुळात यावर चर्चेला उधाण आले आहे.
या ड्रोनच्या माध्यमातून मातोश्रीवर नजर ठेवली जात असल्याचा आरोप ठाकरे गटातील नेत्यांनी केला आहे. उद्धव ठाकरे यांना भेटायला येणाऱ्या व्यक्तींवर लक्ष ठेवण्याचा प्रयत्न होत असल्याची चर्चा रंगली आहे. त्यामुळे या घटनेमागचा हेतू नेमका काय, हे जाणून घेण्यासाठी अनेक तर्क-वितर्क लावले जात आहेत.
दरम्यान, या घटनेवर मुंबई पोलिसांनी अधिकृत स्पष्टीकरण दिले आहे. पोलिसांच्या म्हणण्यानुसार, एमएमआरडीएने अधिकृत परवानगी घेऊनच बिकेसी आणि खेरवाडी परिसरात ड्रोन उडवले आहेत. मात्र, हाय सिक्युरिटी झोनमध्ये गणल्या जाणाऱ्या मातोश्री परिसरात अशा प्रकारे ड्रोन दिसणे ही नक्कीच सुरक्षेच्या दृष्टीने गंभीर बाब मानली जात आहे.
सुरक्षा यंत्रणांनी या प्रकरणाची सखोल चौकशी सुरू केली असून, ड्रोन नेमके कोणत्या उद्देशाने आणि किती वेळ उडवले गेले होते याची माहिती घेतली जात आहे. मातोश्री परिसर हा संवेदनशील भाग असल्यामुळे भविष्यात अशा प्रकारच्या घटनांवर नियंत्रण ठेवण्यासाठी अतिरिक्त सुरक्षा उपाययोजना करण्याची शक्यता आहे.
या घटनेमुळे पुन्हा एकदा व्हीआयपी सुरक्षा आणि ड्रोन वापर यासंबंधीच्या नियमांची काटेकोर अंमलबजावणी करण्याची गरज अधोरेखित झाली आहे.
